Hörpukassar
Það þarf ekki alltaf að flækja hlutina, enda börnin búin að margsanna að einu sinni verðlausir hlutir geta orðið að dýrlegu leikefni. Öldubörnin stukku heim til Hörpu og sóttu stóra kassa. Það varð að dásemdarvinnu og leik. Litlir kassar á lækjarbakka voru fínir en stórir eru ekki síðri.
Ó mín tunga, kæri Jónas!
Fæðingadagur Jónasar Hallgrímssonar, 16. nóvember, er dagur íslenskrar tungu eins og alþjóð veit. Í Ægisborg er orðin hefð að halda upp á daginn með vísum, þulum og sögum. Vísa Jónasar um klæðnaðinn er sérstaklega til umfjöllunar og mörg börnin læra hana, en þá er fréttaritari vitaskuld að meina þessa hér:
Buxur, vesti, brók og skó,
bætta sokka, nýta,
húfutetur, hálsklút þó,
háleistana hvíta.
Sagt er að Jónas hafi ort hana þegar hann var 6 eða 7 ára og lýsti þar klæðaburði sínum. Myndefnið með fréttinni er fengið úr Koti. Elstu börnin kíktu á Hættu að gráta hringaná og það má finna hér m.a.:
Þakkir til KR
KR-ingar skutu skjólshúsi yfir Öldudeild (og hluta Bárudeildar um tíma) meðan á framkvæmdum í Ægisborg stóð. Börnin voru ánægð að þurfa ekki að láta sér vergang nægja, heldur undu hag sínum vel í félagsheimilinu í Frostaskjóli. Þegar hyllti undir dvalarlok settust börn og kennarar á rökstóla og ræddu hvernig væri hægt að þakka fyrir liðlegheitin og þá ljúfmennsku sem öllum var sýnd. Börnin ákváðu að færa KR bikar, enda uppnumin að hafa aðgang að bikarherbergi KR. Friðrik, Stefán, Bjarni og allt annað starfsfólk, þetta var yndislegt. Myndirnar tala sínu máli en þær má finna með því að smella hér að neðan.
Fréttir af framkvæmdum
Allt virðist ganga á eðlilegum hraða í framkvæmdunum. Nú er langt komið að lagfæra Fjörudeildina og samkvæmt áætlun flytja börnin þar inn um miðja næstu viku. Þegar það gerist geta Öldubörnin aftur flutt heim og þurfa ekki lengur að vera úti í félagsheimili KR. Lagfæringar Fjörudeildar taka eilítið lengri tíma fyrir þær sakir að um leið og skipt var um gólfefni var ráðist í endurbót salernisaðstöðu og loftið var fjarlægt. Þá er einnig skipt um lampa og lýsingin er allt önnur og betri eins og við finnum glöggt á Öldu og Báru. Þegar öllu þessu er lokið tekur við smá pása þar til salurinn verður tekinn og lagaður og í kjölfar þeirrar framkvædar verður skipt um gólfefni á eldhúsi og skrifstofu. Allt að gerast í Ægisborg!
Gott mál!
Hagaskóli hélt í dag sinn árlega viðburð Gott mál. Einn angi þess ágæta dags var heimsókn 8 ungmenna úr 9. bekk í Ægisborg. Gestirnir komu til að láta gott af sér leiða og verkefni þeirra var að stuðla að hreyfingu og gleði leikskólabarna. Öldudeild hélt með þeim út á litla gervigrasvöllinn á bak við íþróttahús KR og tók þátt í leikjum undir þeirra stjórn. Það var ákaflega ánægjuleg tilbreyting þrátt fyrir nístingskulda. Við þökkum Hagaskólafólki kærlega fyrir heimsóknina og auðvitað sérstaklega Þórdísi og Anítu sem ekki fyrir svo löngu voru snillingar í Ægisborg. Nokkrar myndir hér að neðan.
