Í Ægisborg er stuðst við þátttökuaðlögun þegar börn byrja í leikskólanum. Eins og heitið ber með sér er hér átt við aðlögun þar sem foreldrar taka virkan þátt í starfi leikskólans á aðlögunartímanum. Foreldrar sinna börnunum, skipta á þeim, gefa þeim að borða, leika með þeim og eru með þeim allan tímann (nema þegar þau sofa).  Miðað er við að þeir dvelji með börnum sínum í þrjá daga. Á fjórða degi kveðja börnin foreldra sína að morgni og eru allan daginn í leikskólanum. Gott er ef hægt er að stytta daginn. Orðin hér að framan eiga við um ung börn sem eru að hefja leikskólagöngu, en um reyndari börn gildir samstarfið; þ.e. foreldrar og deildarstjóri smíða aðlögunaráætlunina í sameiningu.

Nánar um aðlögun má finna hér: Aðlögun.

Afmælisdagur hvers barns er einn stærsti dagur í lífi þess. Haldið er upp á hann í leikskólanum. Afmælisbarnið fær kórónu og er haft í öndvegi allan daginn. Afmælissöngvarnir eru sungnir og barnið fær að velja fyrst ef svo er í pottinn búið. Aukinheldur er unnið sérstakt afmælisblað sem endar í ferilmöppunni.

Við viljum vekja athygli á því að á afmælum er ekki þörf á því að börnin hafi með sér veitingar að heiman, þar sem vel er hægt að gleðjast án þeirra. Vert er að hafa ofnæmi í huga í þessum efnum, en Ægisborgin er t.a.m. hnetulaus. Ef börn og foreldrar vilja bjóða upp á eitthvað er gott að bjóða upp á ávexti. Einnig er hægt að gera sér dagamun í því að hafa með sér uppáhalds bókina eða geisladiskinn eða skrifa afmælisbréf í póstkassann.

Ægisborg er í Vesturbæ Reykjavíkur, nánar tiltekið við Ægisíðu 104. Hér má sjá staðsetninguna á korti .

Leikskólinn opnar kl. 7:30 á Bárudeild, en aðrar deildir opna kl. 8:00. Leikskólinn lokar kl.17:00.

Á vef Skóla- og frístundasviðs Reykjavíkur eru almennar upplýsingar um sumarfrí barna og gilda þær fyrir Ægisborg. Gert er ráð fyrir því að börnin fái 4 vikna samfleytt sumarfrí og undanfarin ár hefur Ægisborg lokað í 4 vikur.

Mikilvægt er að börnin hafi þægilegan klæðnað meðferðis, sem hentar veðri. Tíðin getur verið misjöfn á Íslandi og best að vera við öllu búin. Afar mikilvægt er að börnin hafi með sér aukafatnað og einnig er brýnt að merkja flíkurnar svo þær rati frekar á réttan stað.

Í leikskólanum vinnum við með margvísleg efni, svo sem lím, liti og málningu, sem geta farið í föt barnanna. Þess vegna er ekki æskilegt að börnin komi í betri fötunum í leikskólann! Þau börn sem nota bleiu koma með þær að heiman.

Afbragðsráð er að fara yfir leikskólatöskuna og hólfið að morgni fyrir hvern dag og hafa tilbúið og aðgengilegt það sem barnið þarfnast þann daginn. Í lok föstudags þarf að tæma hólf barnanna svo þrif gangi greiðlega fyrir sig. Í Ægisborg háttar þannig til að aukafötin eru oftast geymd á hillu fyrir ofan hólf barnanna. 

Ef börn þurfa á lyfjum að halda ber að haga lyfjagjöf þannig að lyfin séu gefin heima en ekki í leikskólanum. Undantekningar eru til á þessu og ber að ræða þær við deildarstjóra.

Ef barn slasast eða veikist er haft samband við foreldra án tafar. Annars fara viðbrögð eftir eðli máls og alvarleika í hvert sinn. Eftir slys skráir starfsfólk málsatvik á eyðublað fyrir leikskólann til að halda upplýsingum til haga um hvað gerðist, svokallað slysaskráningarblað.

Forvarnir er gildur þáttur leikskólastarfs. Eitt markmið Ægisborgar er að vinna að forvörnum á víðum grunni, hvort tveggja félagslegum og heilsutengdum. Það er m.a. gert með því að styðja leik barna sem best og með því að starfa með íþróttafélaginu í hverfinu og leggja áherslu á hreyfingu og útivist í leikskólanum.

Forvarnarstefnu Reykjavíkurborgar má finna hér.

Leikskólinn getur aldrei tekið á móti veiku barni. Fái barn smitsjúkdóm verður það að dvelja heima þar til smithætta er liðin hjá. Þetta er nauðsynleg og fyrirbyggjandi ráðstöfun til að forðast útbreiðslu sjúkdóma í leikskólanum og vernda önnur börn hans. Í stöku tilfelli kemur fyrir að barn þarfnast inniveru eftir veikindi, en þá þurfa foreldrar að ræða það við starfsfólk deildarinnar. Hafi starfsfólk tök á er möguleiki á einum innidegi meðan fullri starfsorku er náð. Starfsfólk áskilur sér jafnframt rétt til að meta hvort barn sé orðið það sprækt að það hafi gott af útivist. Allar fjarvistir þarf að kynna til leikskólans.

Verið þið hjartanlega velkomin í leikskólann Ægisborg. Það er stór stund í lífi barns og foreldra þegar fyrstu sporin eru fetuð eftir menntaveginum, fjarri heimilinu. Okkur er það heiður að Ægisborg hafi orðið fyrir valinu sem viðkomustaður á þeirri leið. Þess vegna viljum við gera allt okkar til að vel takist til og þá er samvinna og samráð við foreldra lykilatriði.

Til að upphafið verði sem happadrýgst er gott að glöggva sig á leikskólalífinu. Það gera foreldrar með heimsókn í leikskólann og viðtali við leikskólastjóra. Aðlögunartíminn er sérlega mikilvægur. Brýnt er að rúmur tími sé til aðlögunar og gott samráð sé haft milli foreldra og deildarstjóra um aðlögun barnsins. Aðlögun byggir á trausti: barn þarf að læra smám saman að treysta sér í nýjum aðstæðum leikskólans og foreldrar og starfsfólk að treysta hvert öðru. Stundum tekur það skamman tíma og stundum lengri. Það er eðlilegt.

Hér má sjá hvar við erum í Vesturbænum.

Þegar barn byrjar í leikskólanum er gerður dvalarsamningur um leikskólatíma barnsins. Afar mikilvægt er að sá samningur sé virtur vegna skipulags leikskólans. Ef óskað er eftir breytingum á dvalartíma fer best á því að sækja um breytinguna í gegn um Rafræna Reykjavík. Gagnkvæmur uppsagnarfrestur á dvalarsamningi er einn mánuður og miðast við 1. og 15. hvers mánaðar og skal ávallt vera skriflegur.

Ægisborg lokar í fjórar vikur að sumri.